Xəbərlər

GEOLOGİYA İNSTİTUTUNDA ƏMƏKDAŞLARA QURBAN BAYRAMI MÜNASİBƏTİLƏ ƏRZAQ YARDIMI GÖSTƏRİLİB

Elm və Təhsil Nazirliyi Geologiya İnstitutunun rəhbərliyi və Həmkarlar İttifaqı Komitəsinin təşəbbüsü ilə Qurban bayramı münasibətilə 55 əməkdaşa müxtəlif növ ərzaq məhsullarından ibarət bayram hədiyyələri paylanılıb.

Ərzaq mallarından ibarət bağlamaları əməkdaşlara İnstitutun Həmkarlar İttifaqı Komitəsinin sədri, Beynəlxalq əlaqələr şöbəsinin rəhbəri geologiya-mineralogiya elmləri namizədi Kamran Əliyev təqdim edib.

ELMİ TƏDQİQAT İNSTİTUTLARINDA DEZİNFEKSİYA İŞLƏRİ APARILIB

Elm və Təhsil İşçiləri Həmkarlar İttifaqı Respublika Komitəsinin dəstəyi və Elmi Təşkilatların Birləşmiş Həmkarlar İttifaqı Komitəsinin təşkilatçılığı ilə elmi tədqiqat institutlarında çalışan əməkdaşların sağlamlığının qorunması, sanitariya-gigiyena normalarına əməl olunması və infeksion xəstəliklərin yayılmasının qarşısının alınması məqsədilə dezinfeksiya işləri həyata keçirilib.

Aparılan tədbirlər çərçivəsində institutların inzibati binalarında, laboratoriyalarda, iş otaqlarında, ümumi istifadə sahələrində, dəhlizlərdə və digər xidmət məkanlarında xüsusi dezinfeksiyaedici vasitələrlə genişmiqyaslı dezinfeksiya işləri görülüb. Tədbirin əsas məqsədi əməkdaşlar üçün sağlam və təhlükəsiz iş mühitinin təmin edilməsi, mövcud sanitariya vəziyyətinin daha da yaxşılaşdırılması və mövsümi infeksiyalara qarşı profilaktik tədbirlərin gücləndirilməsidir.

Qeyd olunub ki, əməkdaşların sağlamlığının qorunması, təhlükəsiz əmək şəraitinin yaradılması və sosial rifahının yüksəldilməsi həmkarlar ittifaqlarının fəaliyyətində daim xüsusi diqqət mərkəzində saxlanılır. Bu istiqamətdə mütəmadi olaraq profilaktik tədbirlərin həyata keçirilməsi nəzərdə tutulur.

Elm və Təhsil İşçiləri Həmkarlar İttifaqı Respublika Komitəsi və Elmi Təşkilatların Birləşmiş Həmkarlar İttifaqı Komitəsi bundan sonra da əməkdaşların sağlamlığının qorunmasına xidmət edən təşəbbüslər davam etdirəcəkdir.

Qurban Bayramı münasibətilə əməkdaşlara bayram sovqatları təqdim olunub

Azərbaycan Respublikası Elm və Təhsil Nazirliyinin Bioresurslar İnstitutu, Aqrar Problemləri İnstitutu, Ekologiya və Təbii Ehtiyatlar İnstitutu və Nəbatət Bağı (Gəncə) Həmkarlar Təşkilatıları tərəfindən Qurban Bayramı münasibətilə əməkdaşlara bayram sovqatları təqdim edilib.

Bayram münasibətilə təşkil olunan sosial aksiya çərçivəsində müəssisələrdə çalışan əməkdaşlara müxtəlif ərzaq məhsullarından ibarət sovqat payları çatdırılıb. Tədbirin əsas məqsədinin əməkdaşlara diqqət və qayğının göstərilməsi, bayram sevincinin kollektiv üzvləri ilə bölüşülməsi olduğu bildirilib.

Qeyd olunub ki, Həmkarlar Təşkilatı tərəfindən əməkdaşların sosial rifahının yaxşılaşdırılması, onların mənəvi dəstəklə əhatə olunması daim diqqət mərkəzində saxlanılır. Əlamətdar günlər və milli-mənəvi dəyərlərimizlə bağlı bayramlar münasibətilə keçirilən bu cür təşəbbüslər kollektivdə həmrəylik və birlik mühitinin daha da möhkəmlənməsinə xidmət edir.

Əməkdaşlar onlara göstərilən diqqət və qayğıya görə təşkilat rəhbərlərinə və Həmkarlar Təşkilatına təşəkkürlərini bildirərək, bu ənənənin davamlı olmasını yüksək qiymətləndiriblər.

Fizika İnstitutunun əməkdaşları üçün Zaqatala bölgəsinə turistik səfər təşkil olunub

Azərbaycan Respublikası Elm və Təhsil Nazirliyinin Fizika İnstitutu PHŞ-nin Həmkarlar İttifaqı Komitəsi tərəfindən institut əməkdaşları üçün Zaqatala bölgəsinə 2 gecə, 3 günlük turistik səfər təşkil edilib. Səfərdə institutun 50-dan çox əməkdaşı iştirak edib.

Tur proqramı çərçivəsində iştirakçılar Cihan Town Hotel mehmanxanasında yerləşərək bölgənin tarixi, mədəni və təbiət abidələri ilə yaxından tanış olublar. Əməkdaşlar Zaqatala, Şəki və Qax şəhərlərinə təşkil olunan ekskursiyalarda iştirak edərək həmin bölgələrin qədim tarixi, zəngin mədəniyyəti və gözəl təbiəti haqqında ətraflı məlumat əldə ediblər.

Səfər zamanı kollektiv İlisu kəndində olub, bölgənin əsrarəngiz təbiət mənzərələrini seyr edib, həmçinin Mamırlı Şəlaləsi ətrafında istirahət edib. İştirakçılar üçün çay süfrəsi təşkil olunub, səmimi və xoş atmosfer yaradılıb.

Tur proqramı çərçivəsində əməkdaşlar birgə xatirə şəkilləri çəkdirib, musiqi sədaları altında rəqs edib, maraqlı və unudulmaz anlar yaşayıblar. Səfər kollektiv arasında dostluq və həmrəylik münasibətlərinin daha da möhkəmlənməsinə, əməkdaşların asudə vaxtlarının səmərəli təşkilinə böyük töhfə verib.

İştirakçılar onlar üçün yaradılmış yüksək şəraitə və göstərilən diqqətə görə səfərin təşkilində əməyi olan məsul şəxslərə, həmçinin Cihan Town Hotel mehmanxanasının rəhbərliyinə kollektiv adından dərin minnətdarlıqlarını bildiriblər.

Riyaziyyat İnstitutunda “Ulu Öndər Heydər Əliyev və Azərbaycanın memarlıq inkişaf strategiyası” mövzusunda tədbir keçirilib

Azərbaycan Respublikası Elm və Təhsil Nazirliyinin Riyaziyyat İnstitutunda “Şəhərsalma və Memarlıq İli” çərçivəsində Ümummilli Lider Heydər Əliyevin anadan olmasının 103-cü ildönümünə həsr olunmuş “Ulu Öndər Heydər Əliyev və Azərbaycanın memarlıq inkişaf strategiyası” mövzusunda tədbir keçirilib.

Tədbirdə institutun rəhbərliyi, əməkdaşları, ictimaiyyət nümayəndələri və qonaqlar iştirak ediblər.

Əvvəlcə Azərbaycan Respublikasının Dövlət Himni səsləndirilib, daha sonra Ümummilli Lider Heydər Əliyevin və Azərbaycanın müstəqilliyi, suverenliyi uğrunda canlarından keçmiş şəhidlərin əziz xatirəsi bir dəqiqəlik sükutla yad edilib.

Tədbiri giriş sözü ilə açan İnstitutun direktoru vəzifəsini icra edən, t.e.d., dosent Elxan Səbziyev Ümummilli Lider Heydər Əliyevin Azərbaycanın dövlətçilik tarixində müstəsna xidmətlərindən, ölkədə həyata keçirdiyi genişmiqyaslı quruculuq siyasətindən və şəhərsalma sahəsində müəyyən etdiyi strateji inkişaf istiqamətlərindən bəhs edib. O bildirib ki, Ulu Öndərin rəhbərliyi dövründə ölkəmizdə memarlıq və şəhərsalma sahəsində mühüm layihələr həyata keçirilib, milli memarlıq ənənələrinin qorunması ilə yanaşı müasir urbanizasiya prinsiplərinə əsaslanan inkişaf modeli formalaşdırılıb.

E.Səbziyev qeyd edib ki, bu siyasət bu gün də Azərbaycan Respublikasının Prezidenti cənab İlham Əliyev tərəfindən uğurla davam etdirilir, ölkənin müxtəlif bölgələrində müasir infrastruktur layihələri, yeni yaşayış kompleksləri, sosial obyektlər və abadlıq-quruculuq işləri həyata keçirilir. Xüsusilə işğaldan azad olunmuş ərazilərdə aparılan genişmiqyaslı bərpa və yenidənqurma layihələrinin Azərbaycanın şəhərsalma siyasətinin yeni mərhələsini təşkil etdiyi vurğulanıb.

Daha sonra Ümummilli Lider Heydər Əliyevin həyat və fəaliyyətinə, eləcə də Azərbaycanda memarlıq və şəhərsalma sahəsində həyata keçirilən inkişaf strategiyasına həsr olunmuş videoçarx nümayiş etdirilib.

Tədbirdə çıxış edən Yeni Azərbaycan Partiyası İdarə Heyətinin üzvü Asif Əsgərli bildirib ki, Azərbaycan xalqının Ümummilli Lideri Heydər Əliyev müasir Azərbaycan dövlətçiliyinin memarı olaraq ölkənin siyasi, iqtisadi və mənəvi inkişafında əvəzsiz xidmətlər göstərib. O vurğulayıb ki, Ulu Öndərin uzaqgörən siyasəti nəticəsində Azərbaycan mürəkkəb tarixi mərhələlərdən uğurla keçərək sabitlik, inkişaf və tərəqqi yoluna qədəm qoyub.

Asif Əsgərli qeyd edib ki, Heydər Əliyevin hakimiyyətə qayıdışı Azərbaycan dövlətçiliyinin qorunması və möhkəmləndirilməsi baxımından taleyüklü hadisə olub. Onun rəhbərliyi ilə ölkədə ictimai-siyasi sabitlik təmin edilib, qanunçuluq və dövlət idarəçiliyi prinsipləri gücləndirilib, milli birlik və həmrəylik mühiti formalaşdırılıb. Çıxış zamanı bildirilib ki, Ümummilli Liderin müəyyən etdiyi inkişaf strategiyası Azərbaycanın beynəlxalq aləmdə mövqeyinin möhkəmlənməsinə, iqtisadi potensialının artmasına və xalqın rifahının yüksəlməsinə mühüm töhfə verib.

O, xüsusilə vurğulayıb ki, Heydər Əliyevin əsasını qoyduğu neft strategiyası ölkənin iqtisadi inkişafında dönüş nöqtəsi olub. Bu strategiya nəticəsində Azərbaycanın enerji resursları dünya bazarına çıxarılıb, iri beynəlxalq layihələr həyata keçirilib və ölkəyə böyük həcmdə investisiyalar cəlb olunub. Bununla yanaşı, Ulu Öndərin sosial siyasəti çərçivəsində təhsil, səhiyyə, mədəniyyət və digər sahələrin inkişafına xüsusi diqqət yetirildiyi qeyd olunub.

Daha sonra çıxış edən institutun Cəbr və riyazi məntiq laboratoriyasının baş elmi işçisi, f.r.e.n., dosent Əli Babayev qeyd edib ki, Heydər Əliyev memarlıq və şəhərsalma sahəsini yalnız infrastruktur istiqaməti kimi deyil, həm də milli kimliyin və mədəni irsin qorunmasının vacib tərkib hissəsi kimi qiymətləndirirdi. Onun təşəbbüsü ilə ölkənin müxtəlif bölgələrində tarixi abidələrin bərpası, yeni yaşayış komplekslərinin salınması və şəhərlərin müasir görünüşünün formalaşdırılması istiqamətində mühüm layihələr həyata keçirilib.

Bildirib ki, Ulu Öndərin müəyyən etdiyi şəhərsalma siyasəti bu gün də uğurla davam etdirilir. Xüsusilə paytaxt Bakı ilə yanaşı, regionlarda aparılan abadlıq-quruculuq işləri, yeni parkların, sosial obyektlərin və müasir infrastrukturun yaradılması Azərbaycanın davamlı inkişaf strategiyasının əsas göstəricilərindən biridir. Ə.Babayev vurğulayıb ki, milli memarlıq ənənələrinin müasir üslubla uzlaşdırılması ölkənin memarlıq simasının daha da zənginləşməsinə şərait yaradır.

Sonda Elxan Səbziyev yekun nitqi ilə çıxış edərək tədbirin əhəmiyyətindən danışıb, iştirakçılara təşəkkürünü bildirib və bu cür tədbirlərin gənc nəslin vətənpərvərlik ruhunda tərbiyəsində, dövlətçilik ənənələrinin təbliğində mühüm rol oynadığını qeyd edib.

AR ETN Kimya İnstitutunda Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib.

Mayın 8-də Azərbaycan Respublikası Elm və Təhsil Nazirliyinin Kimya İnstitutunda Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib. Tədbir şəhidlərin və Ulu Öndər Heydər Əliyevin əziz xatirəsinin bir dəqiqəlik sükutla yad edilməsi ilə başlanıb. Sonra Dövlət Himni səsləndirilib, ardınca Heydər Əliyevin Azərbaycan Respublikasının inkişafındakı fəaliyyəti və zəngin dövlətçilik irsinə həsr olunmuş videoçarx nümayiş etdirilib. 

Sonra tədbiri giriş nitqi ilə açan institutun direktoru səlahiyyətlərini icra edən, professor Əfsun Sucayev Ümummilli Lider Heydər Əliyevin Azərbaycan xalqı qarşısındakı əvəzsiz xidmətlərdən danışaraq bildirdi ki, ölkəmizdə ictimai-siyasi sabitliyin yaranması, respublikamızın nail olduğu yüksək iqtisadi inkişaf, o cümlədən, yüzlərlə məhsul istehsal edən kimya sənayesinin inkişafı ümummilli lider Heydər Əliyevin adı ilə bağlıdır. Ulu Öndər hələ 1969-cu ildə Azərbaycanda hakimiyyətə gələndə ilk illərdən başlayaraq ölkədə neft-kimya sənayesinin inkişafına xüsusi diqqət ayırmış, məhz həmin illərdə Sumqayıtda kimya sənayesinin inkişafı, yeni kimya müəssisələrinin yaradılması, mövcud istehsalatların müasirləşdirilməsi sahəsində işlər xeyli sürətlənmişdi. O bildirib ki, Heydər Əliyev müasir Azərbaycan dövlətçiliyinin formalaşmasında olduğu kimi, elm və təhsilin inkişafında da mühüm rol oynamışdır. Onun təşəbbüsü ilə elmi-tədqiqat institutları yaradılmış, ali təhsil müəssisələri modernləşdirilmiş və təhsil sistemində əsaslı islahatlar həyata keçirilmişdir. Belə ki, Ümummilli lider Heydər Əliyevin Azərbaycana rəhbərlik etdiyi 1969-1982-ci illərdə beş yeni ali təhsil müəssisəsi açılmış və ali məktəb tələbələrinin sayı 70 mindən 100 minədək artmışdır. Onun təşəbbüsü və himayəsi sayəsində 1970-ci ildən başlayaraq hər il gənclər SSRİ-nin nüfuzlu ali məktəblərində təhsil almağa göndərilimişdir. Həmin dövrlərdə Sovetlər birliyinin 170-dən çox nüfuzlu ali məktəbində 250-dən çox ixtisas üzrə 15 mindən artıq azərbaycanlı gəncin ali təhsil almasına şərait yaradılmışdır. Bu isə respublikanın milli kadr potensialının daha da gücləndirilməsində mühüm rol oynamışdır. Müstəqillik illərində də, bütün sahələr kimi elm və təhsil sahəsi də daim Ulu öndərin diqqət mərkəzində olmuş, bu sahədə bir sıra qanunlar qəbul edilmiş, islahatlar aparılmişdır. Professor Ulu Öndərin siyasi kursunu uğurla davam etdirən möhtərəm Prezidentimiz İlham Əliyev tərəfindən həyata keçirilən uğurlu siyasət nəticəsində ərazi bütövlüyünün bərpa olunduğunu, ictimai-siyasi sabitliyin və əmin-amanlığın daim qorunduğunu, əhalinin sosial rifahının yüksəldilməsininin dövlətin siyasətində xüsusi istiqamət olduğunu vurğuladı və bundan sonra da İlham Əliyevin rəhbərliyi ilə yeni şanlı səhifələrin yazılacağını, daha yüksək zirvələr fəth ediləcəyini qeyd etdi.

Sonra tədbirdə çıxış edən dosent Faiq Məmmədov, Həmkarlar Təşkilatının sədri dosent Vüsalə Məcidzadə, elmi işçi Nəzakət Əliyeva, Beynəlxalq əlaqələr sektorunun əməkdaşları Araz Dövlətov və Natiq Salahov Heydər Əliyevin Azərbaycan dövlətçiliyinin möhkəmləndirilməsindəki rolundan, elm və təhsil, gənclər siyasətindən, Azərbaycan xalqı qarşısında misilsiz xidmətlərindən danışdılar.

Riyaziyyat İnstitutunun Həmkarlar Təşkilatının yeni heyəti seçilib

06.05.2026-cı il tarixində Azərbaycan Respublikası Elm və Təhsil Nazirliyinin “Riyaziyyat İnstitutu” Publik Hüquqi Şəxsin Həmkarlar Təşkilatının seçki iclası keçirilib.

Tədbirdə Elmi Təşkilatların Birləşmiş Həmkarlar İttifaqı Komitəsinin sədri, hüquq elmləri doktoru, professor Habil Qurbanov, Təhsil İşçiləri Azad Həmkarlar İttifaqı Respublika Komitəsinin (ATİAHİ RK) sədr müavini Mirzə Cəfərzadə, Həmkarlar İttifaqı Komitəsinin Hüquq şöbəsinin müdiri Fuad Nəsirov, Hüquq şöbəsinin baş mütəxəssisləri Rəşad Səlimov və Mirvüqar Seyidbəyli, institutun rəhbərliyi və əməkdaşları iştirak ediblər.

Tədbiri giriş sözü ilə açan İnstitutun direktoru vəzifəsini icra edən, texnika elmləri doktoru, dosent Elxan Səbziyev institutda optimallaşdırma ilə bağlı aparılan struktur dəyişiklikləri haqqında məlumat verib. O bildirib ki, “Elmi müəssisələrin fəaliyyətinin optimallaşdırılması istiqamətində Azərbaycan Respublikası Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında” Azərbaycan Respublikası Prezidentinin Sərəncamına əsasən bir sıra institutların, o cümlədən İdarəetmə Sistemləri İnstitutu ilə Riyaziyyat və Mexanika İnstitutunun bazasında Riyaziyyat İnstitutu Publik Hüquqi Şəxs yaradılıb.

Çıxış zamanı qeyd olunub ki, institutda aparılan yenidənqurma və optimallaşdırma tədbirləri elmi fəaliyyətin keyfiyyətinin yüksəldilməsinə, idarəetmədə çevikliyin artırılmasına və mövcud potensialdan daha səmərəli istifadəyə yönəlib. Eyni zamanda, alimlər üçün daha əlverişli elmi mühitin formalaşdırılması, gənc tədqiqatçıların təşviqi, beynəlxalq əlaqələrin genişləndirilməsi və innovativ tədqiqatların dəstəklənməsi əsas prioritetlərdən biridir.

Elxan Səbziyev onu da diqqətə çatdırıb ki, publik hüquqi şəxs modelinin tətbiqi institutun maliyyə və idarəetmə imkanlarını genişləndirəcək, müasir elmi infrastrukturun yaradılmasına və elmin cəmiyyətlə qarşılıqlı əlaqələrinin gücləndirilməsinə əlavə stimul verəcək.

Sonra E. Səbziyev institutda ictimai təşkilatların yenidən formalaşdırılması zərurətinin yarandığını diqqətə çatdırıb.

Daha sonra Həmkarlar İttifaqı Komitəsinin Hüquq şöbəsinin baş mütəxəssisi Mirvüqar Seyidbəyli Riyaziyyat İnstitutunun Həmkarlar Təşkilatının yeni tərkibinin formalaşdırılması məqsədilə iclasın aparılmasının institutun laboratoriya müdiri, professor Həmidulla Aslanova həvalə olunduğunu bildirib.

Professor Həmidulla Aslanov institutun Həmkarlar Təşkilatının yeni heyətinin, təşkilat sədrinin və Təftiş komissiyasının seçilməsi ilə bağlı gündəlikdə duran məsələlər barədə çıxış edib.

Sonra Riyaziyyat İnstitutu Həmkarlar Komitəsinin və Təftiş komissiyasının yeni tərkibinin seçilməsi ilə bağlı təkliflər dinlənilib, namizədlər irəli sürülüb. Açıq səsvermənin nəticəsinə əsasən texnika üzrə fəlsəfə doktoru, dosent İradə Mirzəzadə Riyaziyyat İnstitutunun Həmkarlar Təşkilatının sədri, 9 nəfərdən ibarət komitə üzvləri və 3 nəfərdən ibarət Təftiş komissiyasının üzvləri seçilib.

Sonda Elmi Təşkilatların Birləşmiş Həmkarlar İttifaqı Komitəsinin sədri, hüquq elmləri doktoru, professor Habil Qurbanov çıxış edərək yeni seçilmiş heyətə gələcək fəaliyyətlərində uğurlar arzulayıb.

AR ETN Coğrafiya İnstitutunda Ulu Öndər Heydər Əliyevin 103 illiyi qeyd olunub

4 may 2026-cı il tarixində Azərbaycan Respublikası Elm və Təhsil Nazirliyinin Coğrafiya İnstitutu PHŞ-də Ümummilli Lider Heydər Əliyevin anadan olmasının 103-cü ildönümünə həsr olunmuş tədbir keçirilib. Tədbir Ulu Öndərin əziz xatirəsinin bir dəqiqəlik sükutla yad edilməsi ilə başlayıb.

Giriş sözü ilə çıxış edən Coğrafiya İnstitutu PHŞ-nin direktor vəzifəsini icra edən, coğrafiya elmləri doktoru, dosent Zaur İmrani Heydər Əliyevin Azərbaycan dövlətçiliyinin möhkəmləndirilməsində, elmin və təhsilin inkişafında göstərdiyi misilsiz xidmətlərdən bəhs edib. O vurğulayıb ki, Ulu Öndərin müəyyən etdiyi strateji kurs bu gün də uğurla davam etdirilir.

Tədbirdə çıxış edən Milli Məclisin deputatı, Müdafiə, təhlükəsizlik və korrupsiyaya qarşı mübarizə komitəsinin sədri Arzu Nağıyev “Heydər Əliyev və təhlükəsizlik sistemi” mövzusunda məruzə ilə çıxış edib. O bildirib ki, Heydər Əliyev hələ sovet dövründə milli təhlükəsizlik sistemində peşəkar kadrların hazırlanmasına xüsusi diqqət yetirib, milli kadr potensialının formalaşdırılması istiqamətində mühüm addımlar atıb. Onun sözlərinə görə, 1990-cı illərin əvvəllərində Azərbaycanın üzləşdiyi daxili və xarici təhdidlər fonunda ölkədə güclü idarəetmə və koordinasiyaya ciddi ehtiyac yaranmışdı. 1993-cü ildə Ulu Öndərin yenidən hakimiyyətə qayıdışı ilə ölkədə sabitlik təmin olunub, dövlət institutları möhkəmləndirilib, təhlükəsizlik sistemi yenidən qurulub.

Arzu Nağıyev qeyd edib ki, həmin dövrdə imzalanan mühüm strateji sənədlər, o cümlədən “Əsrin müqaviləsi” Azərbaycanın iqtisadi və siyasi təhlükəsizliyinin təmin olunmasında həlledici rol oynayıb. O, həmçinin vurğulayıb ki, bu gün Azərbaycanın əldə etdiyi uğurların, o cümlədən 44 günlük Vətən müharibəsində qazanılan Qələbənin təməlində məhz Heydər Əliyevin müəyyən etdiyi dövlətçilik strategiyası dayanır.

Tədbirdə çıxış edən Elmi Təşkilatların Birləşmiş Həmkarlar İttifaqı Komitəsinin sədri, hüquq elmləri doktoru Habil Qurbanov Ulu Öndərin zəngin siyasi irsindən danışıb, onun dövlət idarəçiliyi sahəsində yaratdığı möhkəm əsasların bu gün də aktuallığını qoruduğunu bildirib.

Daha sonra Coğrafiya üzrə fəlsəfə doktoru Şamil Əzizov Heydər Əliyev və şahmat mövzusunda maraqlı çıxış edərək Ümummilli Liderin intellektual oyunlara, xüsusilə şahmata göstərdiyi diqqətdən bəhs edib.

İnstitutun Həmkarlar Təşkilatının sədri Kamran Ramazanlı çıxışında bildirib ki, hər il Ulu Öndərin anadan olmasının ildönümü ərəfəsində keçirilən tədbirlər çərçivəsində müxtəlif idman yarışları təşkil olunur. Bu təşəbbüslərin əsas məqsədi əməkdaşlar arasında sağlam həyat tərzinin təşviqi və kollektiv ruhunun gücləndirilməsidir.

Tədbirin sonunda keçirilən şahmat turnirinin qalibləri mükafatlandırılıb. Yarışda I yeri c.e.d,professor Rza Mahmudov, II yeri c.ü.f.d Ceyhun Qasımov, III yeri c.ü.f.d Emil Cəbrayılov, IV yeri isə Samir Seyidməmmədov tutub. Qaliblərə diplomlar təqdim olunub . Tədbir iştirakçıları gələcəkdə də bu ənənənin davam etdirilməsinin vacibliyini qeyd edərək, belə təşəbbüslərin mütəmadi keçirilməsinin əhəmiyyətini xüsusi vurğulayıblar.

ELM VƏ TƏHSİL NAZİRLİYİ FİZİKA İNSTİTUTU PHŞ “İLİN ƏN YAXŞI MÜƏSSİSƏSİ” NOMİNASİYASI ÜZRƏ MÜKAFATLANDIRILIB.

27 aprel 2026-cı il tarixində Azərbaycan Həmkarlar İttifaqları Konfederasiyası (AHİK) tərəfindən Səməd Vurğun adına Sağlamlıq Mərkəzində 28 Aprel–Ümumdünya Əməyin Mühafizəsi Gününə həsr olunmuş “Təhlükəsiz əmək səmərəli fəaliyyətin əsasıdır” mövzusunda konfrans təşkil edilib.

Tədbirdə Dövlət Himni səsləndirilib, Ümummilli Lider Heydər Əliyevin və şəhidlərin əziz xatirəsi bir dəqiqəlik sükutla yad edilib. Sonra Beynəlxalq Əmək Təşkilatının (BƏT) Baş direktoru Jilber Hunqbonun əməyin mühafizəsi ilə bağlı videomüraciəti izlənilib.

Tədbiri giriş sözü ilə AHİK sədri Sahib Məmmədov açıb və çıxışında əməyin mühafizəsinin işçilərin sağlamlığının qorunması, təhlükəsiz əmək şəraitinin təmin olunması və insan kapitalının davamlı inkişafı baxımından əhəmiyyətini diqqətə çatdırıb. Vurğulanıb ki, Ulu Öndər Heydər Əliyev tərəfindən müəyyənləşdirilən sosial inkişaf strategiyasına uyğun olaraq, əmək münasibətlərinin tənzimlənməsi istiqamətində sistemli yanaşma formalaşdırılıb. Hazırda dövlət başçısı cənab İlham Əliyevin rəhbərliyi ilə həyata keçirilən ardıcıl islahatlar nəticəsində iş yerlərində təhlükəsizlik standartları daha da təkmilləşdirilir, layiqli əmək şəraiti yaradılır.

Tədbirdə AHİK-in bu sahədə gördüyü işlər barədə də məlumat verilib. Qeyd olunub ki, 2025-ci il ərzində bu sahədə həmkarlar ittifaqları tərəfindən müəssisələrdə əməyin mühafizəsi üzrə monitorinq aparılıb, aşkar olunan çatışmazlıqlarla bağlı müvafiq tövsiyələr verilib.

Tədbirdə dövlət rəsmiləri, millət vəkilləri, beynəlxalq təşkilatların nümayəndələri ilə yanaşı, ETİHİ-nin Elmi Təşkilatların Birləşmiş Həmkarlar İttifaqı Komitələrinin sədri Habil Qurbanov və Azərbaycan Respublikası Elm və Təhsil Nazirliyi Fizika İnstitutu PHŞ adından institutun elmi katibi, f.ü.f.d. İbrahim Nuruyev iştirak edib.

Konfrans çərçivəsində sağlam və təhlükəsiz əmək şəraitinin yaradılması üzrə keçirilən respublika müsabiqəsinin nəticələri elan olunub. Elm və Təhsil Nazirliyi Fizika İnstitutu PHŞ işçilərin sosial-məişət şəraitinin yaxşılaşdırılması və əməyin mühafizəsi sahəsində yüksək göstəricilərinə görə “İlin ən yaxşı müəssisəsi” nominasiyası üzrə mükafata layiq görülüb.

İsmayıllıda təşkil olunan istirahət proqramı əməkdaşların asudə vaxtına töhfə verib

AR ETN İqtisadiyyat İnstitutunun 7 əməkdaşı İnstitutun Həmkarlar Təşkilatının təşkilatçılığı ilə 25–27 aprel tarixlərində İsmayıllı rayonunun Xanagah kəndində yerləşən “Castle Resort SPA” otelində 2 gecə 3 günlük istirahət proqramında iştirak ediblər.

İstirahət müddətində iştirakçılar İsmayıllı rayonunun tarixi və mənzərəli məkanları ilə yaxından tanış olub, həmçinin otel tərəfindən təşkil olunan mədəni-əyləncəli tədbirlərdə iştirak ediblər.

Qeyd edək ki, bu cür təşəbbüslər əməkdaşların asudə vaxtının səmərəli təşkili, sosial rifahının yüksəldilməsi və ölkənin müxtəlif bölgələri ilə tanışlığın genişləndirilməsi baxımından mühüm əhəmiyyət daşıyır.

İnstitutun Həmkarlar Təşkilatı bu istiqamətdə fəaliyyətini davam etdirərək il ərzində Azərbaycanın müxtəlif bölgələrində oxşar tədbirlərin təşkilini planlaşdırır.

ELMİ TƏŞKİLATLARIN BHİK-İN İLK HƏMKARLAR TƏŞKİLATLARI TƏRƏFİNDƏN 28 APREL – ÜMUMDÜNYA ƏMƏYİN MÜHAFİZƏSİ GÜNÜNƏ HƏSR OLUNMUŞ TƏDBİRLƏR KEÇİRİLİB

Elmi Təşkilatların Birləşmiş Həmkarlar İttifaqı Komitəsinin (BHİK) ilk həmkarlar təşkilatlarının təşəbbüsü ilə Azərbaycan Respublikası Elm və Təhsil Nazirliyinin tabeliyində fəaliyyət göstərən Geologiya və Geofizika İnstitutu, Fizika İnstitutu, Molekulyar Biologiya İnstitutu, Riyaziyyat və Mexanika İnstitutu, Kimya İnstitutu, İnformasiya Texnologiyaları İnstitutu, Coğrafiya İnstitutu, Genetik Ehtiyatlar İnstitutu və N. Tusi adına Şamaxı Astrofizika Rəsədxanasında 28 aprel – Ümumdünya Əməyin Mühafizəsi Gününə həsr olunmuş silsilə maarifləndirici tədbirlər keçirilmişdir.

Builki silsilə tədbirlər Beynəlxalq Əmək Təşkilatının (BƏT) 2026-cı il üçün müəyyən etdiyi “Sağlam psixososial iş mühitinin yaradılmasını təmin edək!” devizi altında təşkil olunaraq, elmi işçilərin həm fiziki təhlükəsizliyinin, həm də mənəvi-psixoloji rifahının qorunması məsələlərinə fokuslanmışdır. Müəssisə rəhbərləri, həmkarlar ittifaqı sədrləri və sahə ekspertləri çıxışlarında vurğulamışlar ki, müasir elmi mühitdə əməyin mühafizəsi yalnız texniki təhlükəsizlik və sanitariya tədbirləri ilə məhdudlaşmır; bura həm də kollektiv daxilində səmərəli ünsiyyətin qurulması, stressin idarə olunması və peşəkar tükənmənin qarşısının alınması daxildir.

Müzakirələr zamanı xüsusilə informasiya cəmiyyətində yaranan yeni risk faktorlarına – rəqəmsal yüklənməyə, "texnoloji stressə" və distant fəaliyyət zamanı iş-həyat balansının pozulmasına toxunulmuşdur. Laboratoriya şəraitində yüksək texnologiyalı cihazlar, genetik analizatorlar və kimyəvi reaktivlərlə iş zamanı tətbiq edilən texniki normativlər, havalandırma sistemlərinin düzgün işləməsi və fərdi mühafizə vasitələrindən istifadə qaydaları əyani şəkildə xatırladılmışdır. Ekspertlər qeyd etmişlər ki, iş yerində neqativ emosional fon xroniki yorğunluq və psixosomatik xəstəliklərə yol aça bilər, bu səbəbdən empatiya və qarşılıqlı hörmətə əsaslanan mühit həm fərdi sağlamlıq, həm də yüksək əmək məhsuldarlığı üçün əsas amildir.

Tədbirlərin yekununda bildirilmişdir ki, Azərbaycanın 1992-ci ildən üzv olduğu BƏT-in konvensiyalarına uyğun olaraq, hər bir işçinin layiqli, təhlükəsiz və sağlam şəraitdə çalışmaq hüququnun təmin edilməsi dövlətin və həmkarlar ittifaqlarının prioritet vəzifəsidir. Keçirilən maarifləndirici görüşlər, praktiki nümayişlər və mütəxəssis tövsiyələri elmi müəssisələrdə müasir əmək mədəniyyətinin gücləndirilməsinə, şəffaflığın artırılmasına və kollektiv həmrəyliyinin daha da möhkəmlənməsinə xidmət edir.

“Kimya İnstitutu” PHŞ-in Həmkarlar Təşkilatının yeni tərkibi formalaşdırılıb

Azərbaycan Respublikası Elm və Təhsil Nazirliyinin “Kimya İnstitutu” Publik Hüquqi Şəxsin Həmkarlar Təşkilatının seçki iclası keçirilib.

Tədbirdə AR Elm və Təhsil Nazirliyi Elmi Təşkilatların Birləşmiş Həmkarlar İttifaqı Komitəsinin sədri hüquq elmləri doktoru, professor Habil Qurbanov, institutun rəhbərliyi və əməkdaşları iştirak ediblər.

Tədbiri giriş sözü ilə açan institutun direktoru səlahiyyətlərini icra edən, professor Əfsun Sucayev institutda optimallaşdırma ilə bağlı aparılan struktur dəyişiklikləri haqqında məlumat verib. O bildirib ki, “Elmi müəssisələrin fəaliyyətinin optimallaşdırılması istiqamətində “Azərbaycan Respublikası Elm və Təhsil Nazirliyinin tabeliyindəki elmi müəssisələrin fəaliyyətinin optimallaşdırılması və səmərəliliyinin artırılması ilə bağlı əlavə tədbirlər haqqında” Prezident Sərəncamı imzalanıb və nəticədə bir sıra institutlar, o cümlədən akademik Murtuza Nağıyev adına Kataliz və Qeyri-üzvi Kimya İnstitutu və akademik Əli Quliyev adına Aşqarlar Kimyası İnstitutu əsasında “Kimya İnstitutu” Publik Hüquqi Şəxs yaradılıb.

O bildirib ki, institutda struktur və institutsional islahatlar şəffaf və ədalətli şəkildə uğurla həyata keçirilir və uzun illər ərzində tədqiqat institutlarında müxtəlif problemlər mərhələli şəkildə həllini tapmaqdadır. Aparılan optimallaşdırma və yenidən strukturlaşma tədbirləri institutlararası əməkdaşlığa, tədqiqat mühitinin yaxşılaşdırılmasına, tədqiqat işlərinin effektivliyinin artırılmasına, alim əməyinin daha da yüksək qiymətləndirilməsinə, gənc alimlərin dəstəklənməsinə, beynəlxalq elmi əməkdaşlığın genişləndirilməsinə imkan yaradacaq. Müəssisələrin publik-hüquqi şəxs statusunda yaradılması nəticəsində alternativ maliyyələşmə mexanizmlərinin istifadəsinə şərait yaradılacaq, elmi resurslardan daha səmərəli istifadə ediləcək, gənc tədqiqatçılar üçün daha əlçatan və müasir infrastruktur formalaşacaq, həmçinin elmin cəmiyyətlə daha yaxından inteqrasiyası təmin olunacaq.

Alimlərin sosial vəziyyətinə toxunan professor qeyd edib ki, Azərbaycan Respublikası Elm və Təhsil Nazirliyinin tabeliyində olan elmi tədqiqat institutlarında çalışan tədqiqatçıların əməyinin stimullaşdırılması məqsədilə həyata keçirilən proqramın əhatə dairəsi bu il genişləndirilib və sevindirici haldır ki, “Kimya İnstitutu” Publik Hüquqi Şəxsin ümumilikdə 66 əməkdaşı maddi mükafat alanların siyahısına daxil olub. Elm və Ali Təhsil üzrə Dövlət Agentliyinin bilavasitə təklifi və təşkilatçılığı ilə gerçəkləşən bu tədbirlər bir tərəfdən alimin əməyinə qiymət verməklə, onlar arasında sağlam rəqabət mühütünün yaradılması, digər tərəfdən ölkəmizin elminin dünya elminə inteqrasiyası üçün institutlarda aparılan elmi tədqiqatların keyfiyyət göstəricilərinin artırılmasına xidmət edəcəkdir.

Sonra alim institutda ictimai təşkilatlarında yenidən formalaşdırılması zərurəti yarandığını diqqətə çatdırıb.

Daha sonra Kimya İnstitutu PHŞ-nin Həmkarlar Təşkilatının yeni tərkibinin formalaşdırılması məqsədilə iclası sədrliyi institutun “Tədqiqata dəstək” şöbəsinin müdiri AMEA-nın müxbir üzvü Məhəmməd Babanlıya həvalə olunmuşdur.

M. Babanlı iclasın gündəliyi haqqında məlumat verdikdən sonra Elmi Təşkilatların Birləşmiş Həmkarlar İttifaqı Komitəsinin sədri, professor Habil Qurbanova söz verib. H.Qurbanov keçmiş Kataliz və Qeyri-üzvi Kimya İnstitutu və Aşqarlar Kimyası İnstitutunun Həmkarlar Təşkilatlarının fəaliyyətindən danışaraq, onların işini yüksək qiymətləndirib. O hər iki təşkilatın sədrləri olmuş k.e.d., prof. Arif Əfəndi və k.ü.f.d., dos. Elxan İsakovu uzunmüddətli, peşəkar fəaliyyətləri ilə əlaqədar HT-nın Fəxri Diplomu və pul mükafatı ilə mükafatlandırıldığını bildirib.

Sonra “Kimya İnstitutu” PHŞ-in Həmkarlar Komitəsinin və Təftiş-nəzarət komissiyasının yeni tərkibinin seçilməsi haqqında təkliflər dinlənilib, namizədlər irəli sürülüb. Açıq səsvermə nəticəsində k.ü.f.d., dos. Vüsalə Məcidzadə “Kimya İnstitutu” PHŞ-in Həmkarlar Təşkilatının sədri, 9 nəfərdən ibarət komitə üzvləri və 3 nəfərdən ibarət təftiş komissiyasının üzvləri seçilib.

Sonda prof. Habil Qurbanov, prof. Arif Əfəndi və k.ü.f.d., dos. Elxan İsakovun çıxış edərək yeni tərkibə fəaliyyətlərində uğurlar arzulayıblar.